சென்னை: இரண்டாயிரம் பேருக்கு வேலை வாய்ப்பு வழங்கும் வகையில் தமிழக அரசுக்கும் ரேனால்ட் நிஸ்ஸான் நிறுவனத்துக்கும் இடையே புரிந்துணர்வு ஒப்பந்தம் கையெழுத்தாகி உள்ளது.
இதன் மூலம் அந்நிறுவனத்தின் தமிழக உற்பத்தித் திறன் இரண்டு லட்சம் கார்களில் இருந்து நான்கு லட்சமாக அதிகரிக்கும் என்றும் அடுத்த ஐந்து ஆண்டுகளில் வடிவமைப்பு, மேம்பாடு ஆகியவற்றுக்காக அந்நிறுவனம் ரூ.5,300 கோடி முதலீடு செய்யும் என்றும் தெரியவந்துள்ளது.
இது குறித்து தமிழக அரசு வெளியிட்ட செய்திக்குறிப்பில், முதல்வர் மு.க.ஸ்டாலின் முன்னிலையில் கடந்த திங்கள்கிழமை முதற்கட்டமாக 3,300 கோடி ரூபாய் முதலீடு, இரண்டாயிரம் வேலை வாய்ப்புகள் தொடர்பான புரிந்துணர்வு ஒப்பந்தம் இருதரப்புக்கும் இடையே கையெழுத்தானதாகக் குறிப்பிடப்பட்டுள்ளது.
கடந்த 2007-08ஆம் ஆண்டில் ஒரகடம் தொழிற் பூங்காவில், 4,80,000 கார்கள் உற்பத்தித் திறன் கொண்ட ஒரு முழுமையான ஒருங்கிணைந்த அதிநவீன பயணிகள் வாகன உற்பத்தி ஆலையை அந்நிறுவனம் நிறுவியது.
ரேனால்ட் நிஸ்ஸான் குழுமம் ஏற்கெனவே தனது உற்பத்திப் பிரிவின் மூலம் சுமார் 15 ஆயிரம் பேருக்கு வேலை வாய்ப்புகளை உருவாக்கித் தந்துள்ளதாகவும் பொறியியல் மையங்கள், உற்பத்தி திட்டங்கள், விற்பனை நிறுவனங்கள் ஆகியவற்றில் செய்துள்ள முதலீடுகள் வழி மேலும் 16 ஆயிரம் பேருக்கு வேலை வாய்ப்புகள் வழங்கப்பட்டுள்ளதாகவும் தமிழக அரசு தெரிவித்துள்ளது.
வேலை வாய்ப்புகளைப் பெற்றவர்களில் பெரும்பாலானோர் தமிழகத்தைச் சேர்ந்தவர்கள் என்றும் அரசு செய்திக்குறிப்பில் சுட்டிக்காட்டப்பட்டுள்ளது.
“ரேனால்ட் நிஸ்ஸான் இந்தியா நிறுவனமானது தமிழகத்தில் 4.80 லட்சம் கார்களை உற்பத்தி செய்யும் திறனைக் கொண்டுள்ளது. எனினும் தற்போது இருநூறாயிரம் கார்கள் மட்டுமே உற்பத்தியாகின்றன.
“இந்நிலையில், தற்போதைய செயல்பாடுகளை விரிவுபடுத்துவது, அதாவது, உற்பத்தித் திறன் பயன்பாட்டை 2 லட்சம் கார்களில் இருந்து 4 லட்சம் கார்களாக விரிவுபடுத்த அந்நிறுவனம் திட்டமிட்டுள்ளது,” என தமிழக அரசு தெரிவித்துள்ளது.
